Mirabèl

Vos agrada lo bal fòlc? Podètz pas demorar en plaça e los pès vos començan de bolegar solets quand ausissètz una escotisha, una masurca o una pòlca? Amb Mirabèl, vos avèm preparat un bal fòlc amb totes los elements indispensables (danças de coble, collectivas, rondas, filas...); un bal fòlc que serà a l'encòp un viatge instantanèu cap a una bona fèsta de quin endrech que siá d'Occitània. Vos prepausam una dançada amb los ingredients pròpris que se còson actualament dins aquel país, ont la tradicion de las borrèias, dels rondèus e dels sauts se mèscla amb la mòda dels cèrcles ciracassians, de las pòlcas e de las masurcas que circulan per tot lo continent. De las danças mai popularas e conegudas de totes, fins a la dança mai caracteristica d'una region, Mirabèl se prepausa de far banhar la camiseta al bon dançaire, e de porgir una descobèrta plan agradable e interessanta a l'espectador que preferís d'o agachar tranquillament dempuèi una cadièra.

D'unes mai e d'unes mens, mas tot Catalan a ausit parlar d'Occitània; ça que la, ont es e qué es Occitània? Quin rapòrt i an la Val d'Aran, los trobadors, lo Massís Central, lo Lemosin, lo vin de Bordèu, lo Provençal, los Catars, Mistral...?

Dos amics musicians catalans s'aventuran a far un viatge pel sud de França: per pauques sòus vòlon passar lors vacanças a jogar de vila en vila e a se daissar portar per las melodias e las gents de cada endrech. Còp sec, pr'aquò, partejaràn lor viatge amb un autre musician que, al contrari d'eles, es sul camin de tornada cap en çò sieu. E aprendràn qu'aquela destinacion es pas lo sud de França qu'eles imaginavan, mas Occitània: un país que, malgrat tot, uèi encara lo podèm trobar viu.

Ausiràn la lenga, veiràn los paisatges, aprendràn un pauc de l'istòria e de l'actualitat d'Occitània. Mas, sustot, tornaràn amb pro cançons e melodias, e amb lo cap plen d'idèas per, un còp en Catalonha, far conéisser aquela realitat.

Mirabèl presenta aqueste còp un espectacle divulgatiu mes en scena, ont lo repertòri de cançons s'acompanha de projeccions d'imatges.

Mirabèl prepausa un talhièr de danças tradicionalas occitanas, que se pòt realizar abans lo bal fòlc, per exemple, o solet.

Se pòt agir o ben d’una iniciacion a las danças mai generalas qu’òm pòt trobar dins quin bal fòlc que siá en Occitània, o ben, d’un biais mai especific, d’un talhièr monografic (borrèias de 3 temps, sauts biarneses, branles de la val d’Aussau, etc.)

Dispausar de musicians per far lo talhièr es una condicion excellenta, estant que la musica en dirècte s’adapta al ritme dels qu’aprenon.

La durada del talhièr es adaptabla a totas las necessitats, d’una ora a tres, o quitament un cors sus diferentas sessions.